MASWA KUANZA KUKUSANYA KODI YA MAJENGO.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

BARAZA la Mamlaka ya Mji Mdogo Maswa mkoa wa Simiyu, litaanza kukusanya kodi ya majengo ikiwa ni mojawapo ya njia ya kuongeza mapato katika mamlaka hiyo.

Uamuzi huo umepitishwa jana na wajumbe wa baraza hilo wakati wa kujadili bajeti ya mamlaka hiyo ya mwaka 2016/2017 katika kikao kilichofanyika mjini Maswa.

Mwenyekiti wa mamlaka hiyo, Tungaraza Lomole, alisema kuwa lengo kubwa la kukusanya kodi za majengo ni kufanikisha maendeleo katika mji wa Maswa, kufikia matamanio ya kuwa Halmashauri ya Mji.

Alisema huu si utaratibu mgeni kwani kodi hizi zimekuwa zikilipwa maeneo ya mamlaka mbalimbali za miji hapa nchini na zimekuwa zikitumika katika shughuli za maendeleo kama vile kuwapatia wananchi huduma mbalimbali katika sekta ya elimu, afya, kilimo, mifugo na miundombinu ya barabara.

“Kulipa kodi ni lazima kwa maendeleo ya nchi na fedha zote zinazotumiwa na serikali katika kuwahudumia wananchi zinatokana na kodi mbalimbali zinazolipwa na kodi hii ya majengo hutozwa chini ya Sheria ya mamlaka za miji”, alisema.

Alisema kuwa sasa ni wakati kwa viongozi wa mamlaka hiyo hasa wale wawakilishi wa wananchi kwenda katika maeneo yao na kuwaelimisha wananchi juu yaulipaji wa kodi hii.

CHANZO ; HABARI LEO.